Pekinde 2026-njy ýylyň 11–12-nji iýuny aralygynda degişli edaralaryň ýolbaşçylarynyň, diplomatlaryň we abraýly bilermenleri jemlän Adam hukuklary ulgamynda ähliumumy dolandyryş boýunça ýokary derejeli forum geçirildi. Bu barada Türkmenistanyň Daşary işler ministrliginiň metbugat gullugy habar berdi.

Çärä Türkmenistanyň Döwlet, hukuk we demokratiýa institutynyň direktory Ýagmyr Nuryýew gatnaşdy.

«Ýaşyl ösüş we adam hukuklaryny goramak» diýen ýöriteleşdirilen mejlisiň dowamynda türkmen wekiliýetiniň ýolbaşçysy çykyş edip, halkara jemgyýetçiligini Türkmenistanyň döwlet syýasatynyň esasy ugurlary bilen giňişleýin tanyşdyrdy.

Çykyşda Türkmenistanyň özüniň halkara derejesinde ykrar edilen hemişelik bitaraplyk hukuk derejesine berk eýerip, «Ösüş arkaly parahatçylyk» diýen düýpli daşary syýasy ýörelgesini yzygiderli durmuşa geçirýändigi aýratyn bellenildi. Bu döredijilikli strategiýa ýurduň ekologiýa başlangyçlarynda özüniň amaly beýanyny tapýar, bu ýerde daşky gurşawy goramak we tebigatdan oňat peýdalanmak durnukly ösüşi üpjün etmegiň hem-de adam hukuklaryny goramagyň binýady bolup durýar.