Türkmenistanda 24-nji oktýabrda Türkmen alabaýynyň baýramyna bagyşlanyp Halkara «Türkmen alabaý itleri» assosiasiýasynyň altynjy mejlisi geçirildi. Bu ähmiýetli forum milli buýsanjymyz bolan alabaýlaryň dünýädäki abraýyny artdyrmaga we bu ugurda halkara hyzmatdaşlygy giňeltmäge gönükdirildi.

Halkara ahalteke atçylyk assosiasiýasynyň we Halkara «Türkmen alabaý itleri» assosiasiýasynyň binasynda guralan çärä ýolbaşçylar, hünärmenler, daşary ýurtly kinologlar we itşynaslar gatnaşdylar. Duşuşykda häzirki zaman ylmynyň gazanylanlaryny peýdalanmak arkaly tohum arassalygyny gorap saklamak meselesine aýratyn üns berildi.

Mejlisiň çäklerinde milli mirasymyzy we alabaýlaryň edermenligini wasp edýän döredijilik eserleriniň sergisi guraldy. Şeýle hem ÝUNESKO bilen hyzmatdaşlygyň netijeleri bellenilip geçildi.

Hormatly Prezidentimiz Serdar Berdimuhamedowyň Permanyna laýyklykda, hünärmenlere «Türkmenistanyň at gazanan itşynasy» diýen hormatly at dakyldy. Çäräniň ahyrynda assosiasiýanyň täze agzalaryna şahadatnamalar gowşurylyp, daşary ýurtly wekiller çykyş etdiler.

Türkmenistanyň Döwlet habarlar agentligi